Reeds & Drone Reeds for asturian bagpipe

Posts tagged “gaita

Abiertu plazu d’inscripción na Escola de Artes e Oficios de Vigo

Semeya del blogue http://bibliotecadaemao.blogspot.com.es/

Al traviés del blogue Vento e madeira del Aula de construcción artesanal de instrumentos tradicionais galegos de vento na Escola Municipal de Artes e Oficios de Vigo facemonos eco de l’apertura del plazu d’inscripción pal cursu 2013/2014 na escola.

 

Esta escola, onde aprendieron la gran mayoría de los artesanos de gaita que construyen güei en Galicia de manes primero d’Antón Corral y agora mesmu del fíu Ramón Corral ye’l únicu sitiu onde hai estudios reglaos sobre construcción d’instrumentos tradicionales. Otros profesores importantes son por exemplu el zanfonista y constructor de zanfones Xaime Rivas yá que non solo se dan estudios de gaita si no que tamién hai aules de luthería antigua y de zanfona.

 

Nun taría mal una cosa asi n’Asturies, pero de momentu… pa los interesaos dir a Vigo nun ye mala opción.

 

Semeya del blogue http://bibliotecadaemao.blogspot.com.es/

Aula de C.A.I.M de Gaita y zanfona

 


10º Concursu de Gaita de Xixón

Cartel 10º Concursu de Gaita de Xixón

Seguimos coles anuncies de concursos de solistes porque tamos na época d’ello, un concursu yá tradicional nel calendariu asturianu ye’l Concursu de gaita de Xixón entamáu pol Departamentu de Festeyos del Teatru Xovellanos de Xixón al traviés de la Banda de Gaites Noega.

Esti añu hai tres categoríes nel concursu, Gaita solista, Pareya de gaita y tambor y la novedá d’esti añu, Tambor solista. Va desendolcase en dos fases, semifinales que van tener llugar los díes 2 y 3 d’agostu na Plaza Mayor de Xixón y la fase final el día 6 d’agostu na mesma ubicación.

Darréu espublizamos l’enllaz a les bases pa los posibles interesaos. El plazu d’inscripción fina’l 20 de xunetu de 2012 a les 14:00 hores.

Cartel 10º Concursu de Gaita de Xixón

Cursu de música bretona con Stephane y Yann Kermabon

Yann Kermabon y Stephane Kermabon

Yann Kermabon y Stephane Kermabon

Los díes 23 y 24 de marzu va tener llugar na “Escuela de Música Tradicional Manolo Quirós” d’Uviéu un cursu de música bretona a cargu del dúu Yann y Stephane Kermabon. El cursu va desendolcase el vienres de tarde de 19 h a 22 h y el sábadu pela mañana de 10 h a 13 h.

Ta programau en dos partes, una d’aspectos mas teóricos como tipos de bailles, particularidaes de los distintos xéneros musicales, repertoriu de marches y melodíes, escuches de grabaciones o por exemplu como construir una suite bretona. La otra parte, más práctica va trabayase yá cola gaita na ornamentación, les variaciones y les técniques propies de la gaita bretona.

L’únicu requisitu pa los alumnos ye un nivel mediu-altu de gaita.

El preciu ye de 20 € pal públicu en xeneral y de 10 € pa los escolinos de la E.M.T Manolo Quirós, hai un límite de 20 alumnos y podéis informavos nel correu elletrónicu lalagunadeltorollu@hotmail.com 

Si queréis apuntavos el teléfonu de la escuela ye 985 25 50 49 y el plazu ta abiertu hasta’l día 20 de marzu.

El cursu ta entamáu pola Banda Gaites La Laguna del Torollu en collaboración cola E.M.T Manolo Quirós y col sofitu del Conceyu d’Uviéu.

Equí podemos ver a los profesores del cursu nel Championnat de Bretagne des Sonneurs, cellebrau va unos meses en Gourin

[youtube=http://www.youtube.com/watch?v=hpcYjcZp5SM]


Roncones y requintos

Les notes de requintu na gaita asturiana correspuenden a la segunda octava de la que’l punteru tradicionalmente podía dar media (anguaño tan desendolcandose nuevos punteros, estudios y posiciones p’algamar una segunda octava entera). Son notes bastante usaes na música asturiana, sobremanera nos floreos que’l gaiteru toca al entamu y al final d’una pieza pa probar la gaita y calentar los deos pero que pola so poca duración nun se-yos presta demasiada atención a la afinación.

Un problema mui común nes gaites al subir a estes notes de requintu ye que’l roncón varíe porque estes notes consiguense con mayor presión d’aire na payuela. Si queremos podemos amenorgar considerablemente la variación del roncón si a la hora d’afinar el mesmu separamos la copa y la tercia, envede afinar el roncón como normalmente se fae moviendo namás que la tercia separandola o xuntandola cola prima. Repartimos asina la presión del fluxu d’aire nes tres pieces envede facelo namás qu’en dos.

Al nun abrir tanto la prima y la tercia y abrir ente la tercia y la copa algamamos que les cámares interiores del roncón formaes polos diferentes diámetros de los taladros interiores se compensen, l’aire circula más estable y la variación de soníu del roncón al requintar ye muncho menor.

Separación copa y tercia roncón

Separación copa y tercia roncón


El taller de gaites de Cogollu

Antón de Cogollu

Manuel de Cogollu

Manuel Álvarez (Manuel de Cogollu), ñació en Cá Valiente Carbayal (Llanera). Na casa teníen un taller de carros y madreñes y pel iviernu contrataben a madreñeros que llegaben dende Vioño (Gozón). Ún d’ellos trayía una gaita cola qu’amenizaba les nueches tan llargues de la ivernada. Manuel sintióse atrayíu; la curiosidá y la disponibilidá de ferramienta del taller fizo que se decidiese a intentar fabricar una gaita él mesmu copiando de la del madreñeru de Vioño. Darréu quiso aprender a tocala atendiendo con procuru pa los gaiteros de la zona.

Casóse con Carmen Vega nel pueblu de Cogollu (parroquia de San Xuan de Trasmonte de Les Regueres). Ellí siguió col oficiu y nel so taller – fragua del Rozu siguió tamién perfeccionando l’instrumentu algamando notables resultaos en timbre y afinación. Tuvo cinco fíos: Ramón, José, Bernardo, María y Antonio. Cuenten los sos allegaos qu’amás d’Antonio que foi quién siguió col so legáu, llegaron a tocar bien la gaita Ramón, Bernardo y María.

Antón de Cogollu

Antonio Álvarez Vega (Antón de Cogollu) ñaz nel añu 1883 y sigue construyendo gaites nel taller de so pá hasta que casa con Leonor Valdés de Cá Rufa nel pueblu d’Alceu (parroquia de Sotu de Les Regueres) onde instala’l nueu taller. Tuvieron nueve fíos: Florentino, Manuel, Corsino, David, Primitiva, Amada, María, Alegría y Francisco Antonio.

Esti caberu llegó a facer alguna gaita, pero una enfermedá de mozu dexólu indispuestu y torgó la posible continuidá d’esta saga d’artesanos.

La meyor forma de conocer lo que fue’l taller y el trabayu d’Antón en Sotu ye lleer lo que nos cuenten dos colectivos diferentes: los que lu conocieron (xente de la so familia como la muyer o los fíos) y los qu’estudiaron a fondu el so trabayu (gaiteros como Pepe Veriña, Ignacio Noriega o José Angel Hevia o constructores de gaites como Vicente Prado “El Pravianu” o Alberto Fdez. Velasco

EL TALLER

Pepe Veriña (gaiteru): “Yo de chaval tuve nel taller; tenía nel portalón de casa un tornu de pértiga, d’esos que se movíen por una cincha de cueru y pedal; sacaba la copa’l roncón d’una sola pieza y bien vaciada.”

Ignacio Noriega (gaiteru): “… tamién m’alcuerdo que tenía un tornu mui grande y que yera de pedal, y que les copes torneábales d’una pieza y vaciábales ente les piernes…”

Monchu (vecín de Villayo, Llanera): “mio pá tocaba la gaita y fui con él a buscar una a Alceu…. El taller, si podía llamase asina, teníalu debaxu la sala y el tornu yera nada; una polea de cornal de sobéu a pedal..”

El Pravianu (gaiteru y constructor): “… Los torneaos tan perfectos, incrustaciones de marfil… pero quedé ablucáu cuando nel añu noventa pude ver el tornu y la ferramienta que conserven na so casa, faciéndome la idea de los medios colos que trabayaba.

Alberto Fernández Velasco (constructor de gaites): “… y estos paisanos, con un tornu de ballesta, facíen milagros…”

Pieces que conserven en casa de Cogollu

LA MAERA

Emilia (vilba de José Valiente de Carbayal): “… la maera y el marfil de la gaita del mio suegru Valiente, traxéronla unos familiares d’Estaos Xuníos…”

Ignacio Noriega (gaiteru): “ Pues al tíu Antón conocílu una vegada qu’unos indianos de Vidiago vinieron y dixéronme que queríen encarga-y una gaita con maera que traxeren, creo que yera ébanu…”

Alegría Álvarez (fía d’Antón): “… facía munches de buxu, al principiu diba por él al palaciu de Cañe… tamién traíen familiares y amigos maera d’América… “

Marfil conservau en su casa

EL FUELLE Y EL VESTÍU

María y Alegría Álvarez (fíes d’Antón): “Mio pá mercaba algunes de les oveyes a la vecina, Josefa La Pila, y él matábales… la pelleya envolvíala un tiempu en sal, dempués untábalo en ceniza o fariña de maíz, colgabalos con paya dentro pa que aireasen”

“cosíamos los vestíos pa les gaites Alegría y otra hermana, Primitiva. Tamién una señora d’Uviéu que yera la muyer d’un teniente de la Fábrica de La Vega, ella facía flecos a mano y fundes bordaes… “

Fecha por Manuel de Cogollu

Fecha por Antón de Cogollu envirolada en marfil

LES PAYUELES

Gelín de La Casuca (gaiteru de Les Regueres): “… conocí personalmente a Antón y yera muy maniáticu pa trabayar. Facíales de nueche cuando nada ni nadie lu molestare… yeren más piquiñines que les d’agora…”

Alberto Fernández Velasco (constructor): “… les gaites en do# salieron mui buenes, pero cuesta empayuelales. Dixéronme Fariñas y Pepe Blanco qu’él empayuelaba de viciu. Los instrumentos con él, teníen la vida que teníen que tener, porque yeren paríos por él…”

Ignacio Noriega (gaiteru): “… pues home; yera mui buen paisanu y mui buen gaiteru, amás facía buenes payueles; aquelles sonaben siempre…”

LA VENTA DEL INSTRUMENTU

Mª del Carmen (nieta d’Antón): ”… yo yera mui neña cuando morrió mio güelu, pero alcuérdome de velu marchar cola burra y sacaos de punteros pa vender. Otres veces garraba’l tren y marchaba unos díes con gaites. Tamién llegaben encargos por carta d’indianos y pasaba muncha xente pol taller a recoyer los encargos…”

Rogelio Fernández Lana (gaiteru de Teberga): “Diba muncho pola zona a dexar encargos, yo a reparar iba a so casa…”

Nemesio (gaiteru de Torrestío): “… yo supe d’él polos que llevaben el ganáu a Torrestío d’ehi de Les Regueres; mande-y una carta encargando-y una y llevómela hasta Teberga…”

Gelín de Villamiana (gaiteru): “Fue a comprámela José El Xarreru a so casa porque teníen amistá… costóme cuatro mil quinientes pesetes; que me paecieron munches perres. Díxome José “lo bueno hai que pagalo”.

Gelín de La Casuca (gaiteru de Les Regueres): “… cuando quería vender una gaita, poníase a tocala y arremolinábase la xente al so alredor y terminaba vendiéndola…”

Punteros de Cogollu

LA HERENCIA MUSICAL DE COGOLLU

Enrique Mariño El Xarreru la Cuesta de Fitoria foi’l principal deprendiz de repertoriou musical tradicional. En cuantu a la construcción del instrumentu sabemos que Pachu el de Turón pasó llargues temporaes en Alceu, primero deprendiendo a tocar y más tarde viendo como’l maestru Antón torniaba y empayuelaba. Tamién Agapito Pombo en Caborana tenía como referencia los punteros de Cogollu.

Antón ganó seis premios nacionales, varios na Esposición Provincial d’Artesanía, diplomes y medalles.

Gaita fecha por Antón de Cogollu

Nos años ochenta los sos seguiores y estudiosos de la so obra fueron Vicente Prado “El Pravianu” y el recientemente fináu Alberto Fdez. Velasco. A partir d’esti modelu y como ellos mesmos dixeron, con munchu camín abiertu gracies a Antón, punxéronse a trabayar pa temperar y cromatizar el punteru. Con motivu del actu conmemorativu del cincuenta aniversario de la muerte d’Antón (cellebrao el 27 de marzu de 2009) pudimos oyer d’estos dos maestros frases como les que siguen:

El Pravianu: “Cuando entamé a construir en 1978, supe que Cogollu había sio conocíu por tolos gaiteros antiguos y valoráu como’l meyor fabricante de gaita. Toles que llegaron a mí les estudiaba, analizaba y quedaba ablucáu de lo bien trabayaes que taben. Indudablemente foi un home con unes cualidaes estraordinaries pa trabayar. La familia Cogollu foi un pasu perimportante pal perfeccionamientu del instrumentu y el so recuerdu quedará siempre na mente como que lo foron padre y fíu; los meyores.”

Alberto Fdez Velasco: “Él pa mí foi un adelantau de la época… yo namás puedo falar bien d’él y nun lu conocí. El so trabayu siempre merecióme un respetu pergrande, tolos instrumentos qu’empayuele suyos, toos salieron airosos. El so mayor don yera’l timbre y la tónica. Tuvo munchos admiradores, que fuimos los que lu defendimos. Hebo algún problema, porque prestáronse les gaites y tola xente no fue seria al querer copialu y metíen allá de too y aquella timbración que teníen, algunes perdiéronla.

José Angel Hevia (gaiteru): “…la factura de los sos instrumentos merez l´adxetivu d´esquisita. Una pieza torniada poles manes de Cogollu ye más qu´una pieza de gaita. Ye una pieza d´un instrumentu musical. Güei tocamos gaites basaes organolóxica y estéticamente nes de Cogollu. Fixéronse estudios acústicos de los punteros, midiéronse una y cien vegaes los conos interiores, radiografiáronse instrumentos a la gueta d´un secretu tan buscau como´l de Stradivarius. Seguimos la pauta de Cogollu n´estos tiempos nos que la fabricación de gaites nun ye axena a les nueves tecnoloxíes, a la informática, al control numéricu”.

Hebo na gaita asturiana un antes y un dempués del modelu de Cogollu. Manuel y Antón consiguieron graos d’afinación desconocíos hasta aquella fecha y un timbre qu’entovía güei sigue persiguiéndose como’l xenuinu del nuesu instrumentu. Llegaron a construir una amplia gama de punteros, personalmente conservo una docena que van dende 23 cm a 34.5 cm (Mi a Sib). Toos estos testimonios describen a unos artesanos perfeccionistes que con unos medios non mui allá, algamaron unos resultaos sobresalientes.

Alfonso Fernández (Fonsu Les Regueres)
Toles opiniones foron recoyíes por Fonsu y publicaes más estensamente nel Anuariu 2 de la A.C “La Piedriquina”

(Quiero agradecer a Fonsu Les Regueres esti artículu y el so trabayu de dignificación de la gaita asturiana teniendo na memoria a xente como Manuel o Antón de Cogollu, figures perimportantes de la tradición de gaita n’Astutries)