Reeds & Drone Reeds for asturian bagpipe

Posts tagged “como se fae

Con que se faen les payueles? Arundo donax

La caña común (arundo donax) ye una planta perenne de la familia de les gramínees qu’anque d’orixe oriental y non siendo oriunda de la Península Ibérica, asentóse perfeutamente nes riberes del centru y particularmente na rexón mediterránea, contribuyendo a ello la facilidá que tien pa espardese formando cañares pergrandes a les orielles de corrientes y riegos.

Esta planta forma un tueru rastreru y ramificáu, que vexeta a poca fondura en tierra sustancioso que retienen la humedá, consiguiendo asina espoxigar  tallos duros, vacíos, maderizos y recubiertos poles vaines de les fueyes, altos, reutos, con ñudos a trechos, (cuando tan mui siguíos, son los cañutos machu), pudiendo algamar hasta 6 metros d’altor nun añu de crecimientu. Les fueyes son anches, planes, llanceolaes y daqué ásperes.

Tan remataes por panoyes en tonos violetes, bien ramoses,difuses y compautes ( d’unos dos palmos de llargor) y florien na seronda.

Plantación de caña (Semeya de Miguel Galvéz)

Ye la materia prima cola que se faen les cañes de distintos instrumentos musicales de llingüeta simple, como puen ser el saxofón y el clarinete, o de llingüeta doble, como l’oboe, el fagot o como ye’l nuesu casu, la gaita.

La caña usada tradicionalmente n’Asturies foi siempre lo de los cañares de les riberes de los ríos asturianos, que, anque fuera una caña de baxa calidá debío a la humedá del nuesu clima, los gaiteros siempre supieron fabricar una payuela pa la so gaita colos recursos que teníen cerca.

Anguaño, trabayamos con caña de la zona del Llevante mediterráneu o del sur del estáu Francés que nos apurre una meyor calidá.

Vista del corte d'un tubu de caña