Reeds & Drone Reeds for asturian bagpipe

Raúl García

Entamo a tocar la gaita en setiembre del añu 1999 na Escuela de Música Tradicional de Llangréu teniendo como profesor a Chus Solís, (gaiteru y Artesanu Constructor de gaites). Un par d’años dempués entro a formar parte de la Banda de Gaites Conceyu de Llangréu.

Nel añu 2007 dexo la formación llangreana y entro na Banda Gaites Villaviciosa – El Gaitero baxo la direición de Martín Poladura Berros, banda na que toco hasta’l branu de 2011.

A finales del añu 2011 participo na fundación de la Banda de Gaites LaKadarma de Nava cola que vengo tocando dende entós p’aca.

Tamién recibo clases de gaita d’otros profesores como Diego Pangua nos años 2009 y 2010, Rodrigo F. Joglar en 2012, 2013 y Flavio Benito en 2014, 2015.

No que cinca a la fabricación de payueles soi alumnu de Pelayo Fernández Fernández, gaiteru durante munchos años na Banda Gaites Mieres del Camín incluyendo varios años de ser director de la mesma y en “La Bandona” (suma de les bandes de Villaviciosa, Ribeseya, Samartín del Rei Aurelio, Mieres del Camín y Candás) baxo la direición de Jose Ángel Hevia, amás de ser inxenieru industrial que dedico parte de la so investigación a la caña pa gaita.

Con él faigo varios cursos na EMT de Llangréu, bien talleres sueltos como “Acabáu y construcción de payueles asturianes“, “Afinación, mantenimientu y cuidaos de la gaita asturiana” nel añu 2005 o los talleres “Construcción de Payueles I” y “Construcción de Payueles II” desendolcaos en dos fines de semana na mesma escuela nel añu 2006.

Soi alumnu de Pelayo Fernández na asignatura de “Mecánica y mantenimientu de la gaita asturiana” na EMT de Llangréu nel añu 2006 y posteriormente asisto otra vegada a clases con él dende nos años 2010, 2011 y 2012.

Tamién gracies a la fonda amistá que me xune col artesanu de gaites Chus Solís recibo conseyos y asesoramientu davezu sobre les mis payueles asina como d’empayuelao de gaites.

Raúl García