Reeds & Drone Reeds for asturian bagpipe

Latest

XVI Festival de Bandes de Gaites “Villa de Candás”

Esti fin de selmana va tener llugar en Candás un de los festivales de bandes de gaites de más importancia n’Asturies agora mesmu, esti festival “Villa de Candás” vien faciendose dende l’añu 1996. Hai años había muncha más bayura de festivales y alcuentros de bandes pero la crisis llega a too y esti festival tuvo a piques de desapaecer por problemes económicos un añu pero gracies al trabayu en comuña de la Banda de Gaites de Candás siguió p’alantre y anguaño ye un referente pa les bandes.

Nesta XVI edición los que s’averen a Candás van tener la oportunidá de ver a les siguientes bandes:

Banda de Gaites Ribeseya (Asturies)

Banda de Gaitas Xinzo de Limia (Galicia)

Banda de Gaites Llariegu (Asturies)

Bandina d’Escolinos de la B.G Candás (Asturies)

Banda de Gaites Candás (Asturies)

Banda de Gaites Villa d’Avilés (Asturies)

100 Kaba Bagpipes (Bulgaria)

Amás de los grupos folk

Verdasca

Bandina La Curuxa

Banda Latira

El festival va desendolcase tol fin de selmana con diferentes actuaciones en diferentes escenarios de Candás, anque’l platu fuerte ye’l sábadu pola nueche cola actuación de les bandes nel Parque de Les Conserveres, va ser retransmitío pola TPA en directu anque siempre ye más guapo velo ellí. Recomiendovos totalmente acercavos por Candás a disfrutar del ambiente del festival y a ver les diferentes actuaciones.

Podéis informavos de más nel blogue del festival, festivalcandas.blogspot.com.es

 

Método de Percusión para Banda de Gaitas – James Laughlin y Diego Purón

Esta semana salió a la venta el primer volumen del “Método de Percusión para Banda de Gaitas” escritu por James Lahglin, tamboriteru de la banda canadiense Simon Fraser University y Diego Purón de la Banda de Gaites Ribeseya na traducción.

El métodu vien en formatu e-book y son 66 páxines d’exercicios y partitures acompañaes de 43 archivos mp3 pa que tamién pueas escuchalo si tienes cualquier duda respectu a la práctica. Ye’l primer métodu de caxa editáu en castellán lo que lo fae mui atractivu pa la xente que nun se defiende del too bien col inglés.

Pues conseguilu al traviés de la páxina web percusionparabandasdegaitas al preciu de 20 dólares, pagandolu con paypal y al momentu descargueslu nel tu ordenador. Tamién na mesma web pues informate pa dir a clases (online) tantu con James como con Diego, algo a lo que nun tamos mui avezaos pero que ye un avance necesariu na oferta formativa al nivel de les bandes de gaites.

Quiero dende equí felicitar a Diego por facer posible esti métodu en la versión en castellán y qu’esperemos que vengan más trabayos como esti frutu de la collaboración con xente como James.

 

 

10º Concursu de Gaita de Xixón

Seguimos coles anuncies de concursos de solistes porque tamos na época d’ello, un concursu yá tradicional nel calendariu asturianu ye’l Concursu de gaita de Xixón entamáu pol Departamentu de Festeyos del Teatru Xovellanos de Xixón al traviés de la Banda de Gaites Noega.

Esti añu hai tres categoríes nel concursu, Gaita solista, Pareya de gaita y tambor y la novedá d’esti añu, Tambor solista. Va desendolcase en dos fases, semifinales que van tener llugar los díes 2 y 3 d’agostu na Plaza Mayor de Xixón y la fase final el día 6 d’agostu na mesma ubicación.

Darréu espublizamos l’enllaz a les bases pa los posibles interesaos. El plazu d’inscripción fina’l 20 de xunetu de 2012 a les 14:00 hores.

Cartel 10º Concursu de Gaita de Xixón

II Concursu de gaiteros solistes Villaviciosa “Memorial José Huerta Collada”

La Banda de Gaites Villaviciosa – El Gaitero entama con motivu del Festival Internacional de la Gaita 2012 que va tener llugar na capital maliaya en setiembre d’esti añu el siguiente concursu pa gaiteros solistes del que darréu espublizo les bases pal que tenga interés n’apuntase.

Festival Internacional de la Gaita - Villaviciosa

II CONCURSU DE GAITEROS  SOLISTES VILLAVICIOSA

“ MEMORIAL JOSÉ HUERTA COLLADA”

Bases

1.- Podrán tomar parte tolos concursantes que quieran, siempres a títulu personal.

2.- Estableceránse dos categoríes:

-        Infantil: menores de 15 años (ñacíos antes del 1 de setiembre del 97)

-        Absoluta: mayores de 15 años (ñacíos dempués del 1 de setiembre del 97)

3.- La propuesta d’inscripción tien de formalizase unviando per corréu postal los datos personales nuna fueya (onde constarán nome y apellíos, direición y teléfonu de contautu), amás d’una fotocopia’l DNI a:

BANDA  GAITES VILLAVICIOSA

II Concursu de Gaiteros

APT: 23 – C.P:33300

(Teléfonu d’información: 666593574)

o

concursugaiterosvillaviciosa@gmail.com

4.- El concursu va tener dos estayes: preseleición o semifinal y final, dambes abiertes al públicu. Si’l númberu de participantes inscritos ye menor de 15, tolos participantes pasarán direutamente a la fase final.

- Pa la preselleición o semifinal, el concursante tien d’interpretar un tema de llibre elleición.

- Pa la final, de 15 participantes seleicionaos (si’l númberu d’inscritos ye mayor de 15), el concursante tendrá d’interpretar 2 temes, ún de la llista que vien darréu y otru de llibre elleición. Les canciones han de ser interpretaes ensin añedíos nin supresiones.

 

1.- Muñeira de Remis

2.- Floréu de Remis

3.- Ecos de la Quintana

4.- Fandangu puntiáu

5.-  Muñeira Barganaz

6.- Xota’l Centru

7.- Baille ´l Centru

8.- Alborada’l paxarín

9.- Xota l’Oriente

10.- Muñeira de Veriña

11.- Saltón

12.- Xiringüelu Remis

 

 

5.- La fecha tope pa la receición de les inscripciones ye’l día 17 d´agostu.

6.- La rellación de participantes fadráse pública’l día 22 d’agostu, nun actu abiertu al públicu que se va facer en la Fundación José Cardín Fernandez de Villaviciosa a les 13:30 hores. Nesti actu va sortease l’orde de participación na preseleición y / o final.

7.- La preseleición o semifinal va facese’l domingu 26 d’agostu, a partir de les 19:00 hores, en el llugar estableciu pola organización.

8.- La final del concursu va ser el domingu 2 de setiembre de 2011, a les 19:00 hores, nel llugar estableciu pola organización, nel marcu del Festival Internacional de la Gaita 2012 ( FIG´12).

9.- La non presentación o incomparecencia na preseleición o na final tendrá de ser comunicada cola másima antelación y va trayer consigo la descalificación del concursante. El concursante tendrá de presentase, como mínimo, 60 minutos enantes del entamu, tanto pa la preseleición como pa la final.

10.- Los concursantes han d’emplegar como instrumentu la gaita tradicional asturiana (d’un sólu roncón) en cualesquiera de les sos modalidaes. Tamién ye obligatoriu l’usu del traxe tradicional asturianu, anque sólo na final del concursu.

11.- Afítense los premios que vienen darréu:

-        Categoría Infantil:           1º -150€, diploma y troféu.

                                          2º -50€, diploma y troféu.

                                          3º -30€, diploma y troféu.

-        Categoría Absoluta:      

                                          1º -500€, diploma y troféu.

                                          2º – 200€, diploma y troféu.

                                          3º – 100€, diploma y troféu.

 

11.- El Xuráu tará compuestu por tres miembros cualificaos, designaos pola organización, y presidíu pol direutor de la Banda de Gaites Villaviciosa o persona na que delegue.

12.- El fallu del Xuráu sedrá inapelable; asina mesmo, resérvase’l drechu a la meyor interpretación d’estes bases, a les que s’obligarán los concursantes pol fechu de formalizar la so inscripción.

13.- El ganador del concursu tendrá que facer una actuación de 15 minutos en un establecimientu collaborador ( 23,00 h. aprox).

 

Colocar la payuela nel punteru

Algo perimportante a la hora de colocar la payuela nel punteru de la gaita ye hasta ónde la metemos na garganta del punteru. Por norma xeneral, en toles gaites metiendo la payuela al tope de lo que nos permita el punteru conseguimos un soníu estable, potente y claru. Cuantu menos calada vaya nel punteru, menos vamos conseguir esti soníu, si bien ye cierto que n’ocasiones puede interesar non calala al tope, yá que l’espaciu que se produz entre’l ferrete y el conu, que pue nun llegar nin a un par de milímetros, fae que la payuela desafuegue la corriente d’aire muncho meyor, meyorando sobre tou les notes de requintu.

Probando a introducir más o menos la payuela y faciendo la combinación xusta entre ella y el punteru podemos conseguir un términu mediu d’estes cualidaes consiguiendo un soníu estable, potente y claru, pero también conseguir que les notes de requintu meyoren considerablemente sacando asina el másimu rendimientu al punteru.

 

Tabla 1, Subir tonu baxar tonu

Entamamos con esta una serie de post dedicaos a unes tables perinteresantes feches por Pelayo Fernández que parten d’aspectos básicos pa furrular cola payuela, n’esti casu el subir o baxar el tonu en xeneral.

Otru día estudiaremos les distintes zones de raspao de la payuela de la gaita asturiana o los problemes más comunes que suelen presentase a la hora d’empayolar un punteru y les sos posibles soluciones.

Tabla 1. Subir o baxar tonu de la payuelaTabla 1. Subir o baxar tonu de la payuela

 

El conceptu de caña blanda/duro varía en función del material al ser la caña un material natural, pero podemos seleccionalo y tenelo en cuenta gracies al test del agua del que yá falamos anteriormente nel post dedicáu a la selleición del material.

El ciclu de producción de la caña (arundo donax)

Conocer el material ye un aspectu fundamental a la hora de ponese a facer payueles y pa conocer la caña ye básico saber el so procesu de produción dende qu’entama a espoxigar nel cañal hasta que llega al taller cortao, seco y llimpio.

El material usáu pa la ellaboración de les payueles provién, nel mio casu, d’una plantación que ta situada n’un pueblu de Valencia siendo un sitiu perafayaízu pa esta xera, a 15 km. del Mediterráneu. Ésto dai bones carauterístiques al material por nun tar n’ún sitiu de constate humedá, asina el secáu ye más precisu al nun tener que desprendese la caña del agua que ta recibiendo de siguío como otres plantaciones de ríu; el regadíu por sistema “de goteu” dai la humedá necesaria dependiendo de les condiciones del tiempu nes diferentes époques del añu.

Tamién gracies a la situación recibe aire secu que vien del poniente (aires de Castiella), el mestral (aires del Cantábricu) y por supuestu el suave del Mediterráneu.

La siega de les cañes faese nos menguantes de xineru y febreru, que son los meses nos que la caña cortada conserva la so mayor elasticidá y calidá. Darréu de la siega entama’l procesu más delicáu, que consiste en guardales a la solombra, ataes en gavielles d’unes venti unidaes pa que conserven la rectitú, faen falta lo menos tres atadures pa cada gaviella de cañes una a cada mediu metru, bien apretaes.

Nos meses de marzu – abril desátense les gavielles de les cañes y quitense les fueyes sobrantes que yá tarán seques, dexando la caña llimpio, y vuelven atase igual qu’al entamu y guardase nel mesmu sitiu.
Nos meses de secanu, xunu y xunetu, pondránse a secar por separáu cada una, yá un poco inclinaes y al sol demientres unos diez díes, dando-yos la vuelta ca dos díes pa que’l secáu seya uniforme por tola circunferencia y tengan el color doráu que se quier algamar pa dempués pasar a cortalo en trozos de la medía necesaria pa pasar a trabayalo pa facer cañes de los diferentes instrumentos de caña doble.

cañar valencia

cañar valencia

Nel mio casu, trabayo con caña d’una plantación que ta abonada con nitratos sódicos y potásicos en réxime de materia orgánica ecolóxica, lo que lo fae un material llibre de tóxicu.

Quiero destacar dende equí l’agradecimientu a Miguel Gálvez que ye la persona que m’enseña estes y tantes otres coses sobre la caña y la so producción.

El celo como recursu pa la afinación del punteru

L’usu de celo o cinta aislante pa facer más pequeñu el tamañu de los furacos de les notes del punteru ye un vezu en gaiteros d’otres zones pola so facilidá y buen resultáu, pero equí n’Asturies anque si ye usáu por bastante xente otros a veces por desconocimientu o a veces por “purismos” de nun querer importar modes que n’esti casu si que son beneficioses pal instrumentu nun lo faen.

En resumides cuentes l’efectu que se consigue ye que si una nota ta alta (falamos alto o baxo en rellación cola afinación) amenorgando el diámetru del furacu con celo o cinta aislante conseguimos baxar esa nota. Ye curiosu el casu del mi natural, que tapando con cinta parte de la tronera trasera conseguimos l’efectu contrariu de subir la nota.

Pa saber cuantu tenemos que tapar pondremonos delante l’afinador (o d’oreya si tas avezáu) y habrá que dir probando hasta que la nota que queramos igüar quede nel sitiu.

rollu de celo

Navayes pa payueles

Dalgo básico pa la construcción de cañes o mesmamente pal retoque d’ella una vez empayuelada la gaita ye tener una buena navaya en buenes condiciones d’afilao. Nel mercáu hai munches navayes especiales que los instrumentistes d’oboe o de fagot usen pal raspau de les cañes, pero na mio opinión son demasiao cares (polo xeneral) y non siempre ta relacionao la calidá – preciu d’estes navayes o cuchillos.

Sin dir más lloñe, podemos averanos a Taramundi, conceyu d’Asturies de gran tradición cuchillera y navayera nel que de siempre hubo gran fama d’artesanos y podemos escoyer entre tolos modelos que faen. Hai dalgunos artesanos que conocen les navayes de punta chata como “navallas de palletas” porque sabíen que yeren buscaes polos gaiteros pa repasar les sus payueles.

Podemos buscar la que más nos preste y de xuru que nos va durar munchu tiempu mentantu la mantengamos bien afilada y bien cuidada, la única recomendación ye que la merques n’aceru al carbono, muncho meyor que l’inosidable.

Pa tener una lo meyor ye averase hasta Taramundi y consultar na oficina de turismu el llistáu d’artesanos de navayes a los que podéis dir a ver personalmente, si queréis la d’unu n’especial o si non nes tiendes de la villa vais poder atopar una gran variedá de navayes de diferentes artesanos.

navayes taramundi

navayes de taramundi

Resultaos 1ª fase XXII Liga Galega de Bandas de Gaitas

Esti fin de selmana disputose nel Pazo de Congresos e Exposicions de Galicia en Santiago de Compostela la primera fase de la XXII Liga Galega de Bandas de Gaitas onde competíen les asturianes BG Candás en primer grau y BG Ribeseya en segundu.

Nel casu de segundu y primer grau la competición desendolcose pola tarde y tuvo los siguientes resultaos.

2º Grao.

1. Ribeseya

2. Os Blancos

3. Os Trintas

La banda ganadora d’esta fase, la asturiana de Ribeseya dirixida por Diego Purón y Álvaro Cueto saco un total de 24,65 puntos más que la segunda clasificada, Os Blancos de Ourense que quedo más axustada cola tercera clasificada, Os Trintas de Trives quedando a 2,4 puntos.

1º Grao.

1. Ledicia & Fornelos de Montes

2. Candás

3. Xinzo de Limia

N’esti casu el premiu quedo en tierres gallegues pa la banda Ledicia & Fornelos de Montes que quedo a 4’49 puntos de la segunda clasificada, la banda asturiana de Candás dirixía por Velu Muñiz. La tercera clasificada, la banda ourensana de Xinzo de Limia quedo a namás 1’11  puntos del segundu puestu de Candás polo que la competición tará reñida na segunda y última fase de la liga que se va cellebrar el caberu fin de selmana de xunetu pero que inda nun se sabe onde va tener llugar.

Puen consultase les puntuaciones completes na web de la Federación Galega de Bandas de Gaitas
Norabona dende equí a les bandes participantes y suerte pa la segunda fase.