Reeds & Drone Reeds for asturian bagpipe

Opiniones

Banda de Gaites Camín de Fierro

La Banda de Gaites Camín de Fierro ñaz nel añu 2002 como agrupación de músicos de los conceyos de Santu Adrianu, Proaza y Teberga. Tien tocao en festivales per Francia, Bretaña, Arxentina, Bélxica, amás de por supuestu toa Asturies. Nel añu 2012 editaron el discu “10 años nel camín” y ye la banda escoyida pa representar a Asturies nel añu 2014 nel Festival Intercélticu de Lorient/An Oriant

camin ”Dientro de los trabayos que teníemos programaos pa esti añu 2014, con motivu de la nuesa participación nel Festival Intercélticu de Lorient, la puesta a puntu de les gaites ocupaba un llugar cimeru y una dedicación perimportante. Utilizamos gaites en sib, d’un solu roncón, con punteru acampanáu fabricaes pol artesanu Miguel Alonso Cachafeiro.

Queríemos siguir con un soníu brillante, ricu n’armónicos y deseyabemos ameyorar la presión y l’afinación de la manzorga, tamién perseguíemos tener un poco más d’estabilidá nel ataque y por supuestu, mantener la facilidá y la fiabilidá cola que les gaites requintaben. La decisión de contar con un especialista nel empayuelao foi tou un aciertu, amuésase, a lo menos nesti casu, qu’esternalizar ciertos trabayos y contar con especialistes permite algamar un mayor rendimientu de los instrumentos y supón un aforru de tiempu considerable. La so metodoloxía de trabayu, amás de ser perpráctica porque nun te dexa ensin gaites ni un solu ensayu, dexa pocu sitiu al error. Primero, a partir d’una gaita, obtien la payuela idónea pa esi modelu de punteru y pa los requerimientos que desees, a partir d’esi modelu empayuela tolos punteros y adaptándose a la presión cola que trabaya cada músicu y qu’enantes se marco pa cada punteru. Yá pa finar la prueba y el retoque de toes y ca una de les gaites a lo llargo de dos sesiones y coles indicaciones de cada músicu va faciendoles a lo llargo del ensayu.

Poco más qu’añadir, que si a la profesionalidá, entendía esta non solo como la técnica y el conocimientu, sino como la técnica, el conocimientu y el rigor y la seriedá, añades amabilidá y paciencia infinita, el resultáu son instrumentos 100 % preparaos y músicos 100% contentos.”

Balbino Menéndez Suárez, direutor de la BG Camín de Fierro

 

Banda de Gaites El Gumial

BG El  GumialSupe de la esistencia de Raúl pola so páxina nel facebook, pronto entame a ver que’l so trabayu meyoraba a llargues marches y llamelu pa ver si podía acercame hasta’l so taller a empayolar la mi gaita en sib de Miguel Alonso, fizome un güecu y a los dos díis taba nel so taller de Barros.

Cuando llegué tenía unes cuantes payueles preparaes y entamó a probar una por una y hasta que nun vió que taba a gusto nun paró, dicho y fecho, los resultaos increíbles… estabilidá en toles notes, comodidá de tocar y requintar y un soníu potente y brillante.

Dempués de dos díes tocando con ella y viendo que taba igual que’l primer día llamelu pa empayolar toles gaites de la banda. Acercose hasta’l nuesu local d’ensayu y dexo los 10 punteros en sib de Miguel Alonso a gustu de cada gaiteru en cuantes a presión pero igualaos en cuantes a afinación. Cuando nos pusimos a probales en conxuntu, toos se sorprendieron pa bien de la voz y la potencia que teníen les gaites.

Tamién aprovechamos pa empayolar con él varies gaites en do de los constructorse Alberto Fernández, Hevia y Toni Caborana y quedamos encantaos col resultáu.

Amás de too esto, a les dos semanes volvió pa retocar toles gaites y dexales bien asentaos y la verdá ye que a parte de lo finu que ye pa les payueles, ye una gran persona y dionos un tratu mui bonu.

Diego Lobo, direutor de la Banda de Gaites El Gumial

 

Borja Baragaño

Nel mio casu empayuelé recientemente una gaita en Sib de Miguel “Colunga”. Col modelu de payuela en sib de Raúl García conseguí un soníu brillante, requintu sin problemes  y afinación perfeuta. D’otramiente mismu gastu d’aire n’ambes manes y uniformidá en trinos y repeticiones “a la escocesa”.

Tratu mui afayadizu y paciencia nel taller a la hora d’empayuelar, prueba, retoca, prueba, retoca…

En resumíes cuentes, escelente serviciu inclusu pa un “ex-soplagaites” como yo.

Borja Baragaño ye gaiteru y flautista, toco en numerosos grupos y anguaño ye director de la Banda de Gaites Mieres del Camín amás de dar clase de gaita y xiblata na Escuela de Música Tradicional  La Quintana de Xixón y la Escuela de Música Tradicional de Morea d’Ayer. Amás d’ello a día de güei toca nos grupos folk DRD y Felpeyu.

 

Banda de Gaites Ribeseya

Campeona en 2º Grao de la XXII Liga Galega de Bandas de Gaitas (2011-2012)

 

” Dende’l primer día nel que Raúl nos propuso entamar a usar les sos payueles en si bemol sabíemos que con tiempu dibemos algamar un cambiu de soníu qu’andabemos buscando.

El resultáu foi más rápidu de lo que creíemos, y en poco tiempu atopamonos con unes payueles en si bemol con muncha voz, un soníu más brillante, agudu, y una afinación estable.

La caña cola que fae les payueles ye d’escelente calidá, y l’acabáu del que’l propiu Raúl se fizo cargu tras unos meses de duru trabayu, foi un gran pasu p’alante na BGRibeseya

 Álvaro Cueto, director de gaites de la Banda de Gaites Ribeseya

 

 

José Luis Fernández Álvarez

Gaiteru y clarinetista (Titulo Profesional de Clarinete 2010 y de Gaita 2012)

” Les payueles adaptense perfectamente a les mis gaites, proporcionando una sonoridá reonda, afinada y agradable al oídu. Nos requintos lleguen bien, con un control fácil y afinau de les notes.

Un datu a tener en cuenta ye’l frenu d’alambre que permite ampliar el rangu de posibilidaes (frente al frenu de maera) “

Concursos:

3º puestu nel Concursu de Lliberdon 2010 Finalista nel Concursu y Muestra de folklor Ciudá d’Uviéu en 2009 y 2011.

3º puestu nel Concursu y Muestra de folklor Ciudá d’Uviéu 2012.

Representante d’Asturies nel Trofeu McCrimmon del Festival Interceltique de Lorient en 2011 y 2012.