Reeds & Drone Reeds for asturian bagpipe

Gaites

¿Cuántu tiempu dura una payuela?

Payuela nueva vs. payuela vieya
“Porque tengo yo un conocíu… que lleva 6 años cola misma payuela na gaita de [insertar equí nome d'artesanu] y como un cañón chaval, flipes eh? Pero flipes! Como’l primer día!”

Quién dentro del mundillu gaiteril nunca oyó esta frase recurrente sobremanera a ciertes hores de la nueche onde too se magnifica y la xente entama a competir por ver que gaita tien una payuela más vieya y qu’haya resistío más batalles??

 

Por eso güei voi falar d’un tema con un poco de polémica, sería bien fácil pensar que’l mayor interés d’un payueleru como soi yo ye que la xente cambie cada poco de payueles y aunque’l tema económicu siempre ta presente nesto pa bien y pa mal (tirando payueles a medies  o alargando la vida de payueles que tan más qu’acabaes) un puntu importante y que munches veces se dexa de llau ye’l nivel de respuesta d’una payuela nueva y recién empayuelada.

Les payueles como yá tratamos n’algún post esplicativu sobre l’orixe de la caña son la mayor preocupación de los gaiteros porque xunen un material vivu como ye la caña cola técnica d’un instrumentu de vientu como ye la gaita onde l’afinación se consigue pola presión lineal que vien de la combinación fuelle + soplar.

Si nos ponemos a investigar sobre la caña (arundo donax) dámonos cuenta rápido de que ye un material vivu que tien un procesu de crecimientu, dende que la semiente entama a espoxigar na tierra hasta que los recolectores d’ello deciden que ye’l momentu de cortar. Pasa dempués al procesu de secao y selección del mesmu, cosa que tien bastante que ver col resultáu final, yá que por mui bonu que seya’l tarrén onde ta plantáo la caña, ensin un bon procesu de secáu la caña echase a perder. Finalmente llega a manes del payueleru que ye’l que trabaya los tubos pa convertilos nes dos llámines de caña que producen el soníu de la gaita.

Seguíamente, cuando la payuela yá ta terminada, puesta n’una gaita acorde a les esixencies d’afinación y gustu del gaiteru entama inevitablemente’l procesu de deterioru de la caña, insuflamos aire na gaita a través del soplete y esti aire condensase nel interior del fuelle pola diferencia de temperatura ente’l nuesu cuerpu y l’esterior, esta humedá y la vibración de les dos pales de la payuela faen que col tiempu la payuela vaya perdiendo brillu.

Payuela nueva vs. payuela vieya
Payuela nueva vs. payuela vieya

Que quier decir tou esto? Una payuela va sonar igual una semana depués d’empayolar que ye cuando va asentar y quedar perfecta que dos años depués? NON! Pue sonar bien? sí, pero de nenguna manera tará col mesmu potencial de soníu nin la mesma respuesta.

Y la entruga del millón… ¿Cada cuantó habría qu’empayolar entós? Depende, munchos factores como les hores que’l gaiteru-y meta a l’instrumentu, l’ambiente onde ta la gaita (la humedá de la casa onde vivamos influye y muncho), o inclusu el propiu cuerpu de cada unu yá que non toos tenemos la mesma temperatura corporal y hai xente que saliva más o menos a la hora de tocar.

Como recomendación personal, por norma xeneral en torno a ocho meses/un añu sería una duración que yá tuvo bien teniendo un usu normal de en tornu a 15 minutos diarios y una clase o ensayu semanal d’una o dos hores.

Al final, ta nes manes del gaiteru saber cuando la payuela ta “acabada” (por llamalo d’alguna manera) y ye recomendable camudala por una nueva que de al instrumentu la meyor sonoridá posible.


Concursu de Bandes de Gaites de Xixón 2013

Festival Arcu Atlánticu

Esti sábadu 27 de xunetu va tener llugar nel recintu del Pueblu d’Asturies en Xixón el Concursu de Bandes de Gaites de Xixón 2013 que ta dientro de les actividaes del Festival Arcu Atlánticu.

Dende l’últimu Campeonatu d’Asturies entamáu pola FIGA nel 2002 nel mesmu escenariu nun había manera de facer algo asina otra vez, dempués d’algunos intentos y non poques discusiones por fin hai al menos una fecha nel calendariu de les bandes qu’esperamos que siga p’alante nel tiempu y vayan a más les bandes participantes.

 

 

L’apertura de puertes va ser a les 10:30 y la primer banda en concursar va facelo a les 11:00, hai 9 bandes inscrites y l’orde d’actuación ye’l siguiente calculando más o menos unos 10 minutos pa cada banda.

 

1. Banda de Gaites El Gumial (Morea d’Ayer)

2. Banda de Gaites El Exambre (Navia)

3. Banda de Gaites Xácara (Uviéu)

4. Banda de Gaites Candás (Candás)

5. Banda de Gaites LaKadarma (Nava)

6. Banda de Gaites Noega (Xixón)

7. Banda de Gaites Castrillón (Castrillón)

8. Banda de Gaites La Reina del Truébano (Navia)

9. Banda de Gaites Ribeseya (Ribeseya)

 

El xuráu del certamen ta compuestu por Marco Antonio Guardado nel apartáu de gaita, Stuart Cassels nel apartáu de conxuntu, Tommy Johnston na percusión y Leopoldo García na estética.

 

Al finar el concursu les bandes van desplazase hasta’l puertu deportivu de Xixón onde a eso de les 13:30 entamára un pasucais dende la estatua de Pelayo hasta l’escenariu del Festival situáu al final de paseu de Fomento. Ellí va facese la llectura de les puntuaciones y la entrega de premios a les bandes meyor clasificaes.
Dende equí deseái muncha suerte a toles bandes participantes y que seya un día guapu de convivencia entre toos.


Poiter

Pablo Carrera

El pasáu sábadu 27 d’abril presentose’n Llaviana “Poiter”, un productu desendolcau pol gaiteru Pablo Carrera que contribuye un poco más al futuru de la gaita.

El Poiter ye un soporte específicu pa gaita (tantu asturiana como gallega o escocesa) formáu por un pie y dos brazos, ún pa sostener el roncón y otru p’apoyar n’él el punteru de la gaita. Ye plegable pa poder llevalu a les actuaciones y amás ye personalizable porque podemos escoyer color pa la pinza del roncón.

despiece PoiterPoiter (Fotos de Marcos Vega / Photolounge)

El inventu patentáu del gaiteru llavianés vien a cubrir el vacíu qu’esistía n’esti aspectu pa un instrumentu como la gaita, nel que siempre se tuvo qu’usar por exemplu una silla pa colocar el instrumentu mientres nun se taba tocando con él.

Ye bien guapo ver como les nueves xeneraciones vamos aportando’l nuesu granín al mundu la gaita y naguamos por ver como’l mercáu del Poiter medra asina como l’espoxigue de nuevos productos pa la gaita a veces simples pero necesarios como ye esti soporte.

Pablo Carrera

Pablo Carrera (Fotos de Marcos Vega / Photolounge)

Pues conseguir el tuyu equí al preciu de lanzamientu de 75 euros.


Tabla 3, Problemes básicos II

Tabla 3, Problemes básicos II (Pelayo Fernández)

Equí vos dexo la cabera tabla de Pelayo Fernández, na que se fae referencia a varios problemes básicos a la hora d’empayolar la gaita.

Espero que vos seya d’utilidá.

 

Tabla 3, Problemes básicos II (Pelayo Fernández)

Tabla 3, Problemes básicos II (Pelayo Fernández)


Tabla 2, Primeros problemes básicos

Tabla 2 afinación por Pelayo Fernández

Depués d’un pequeñu parón volvemos a la carga otra vuelta coles tables sobre afinación feches por Pelayo Fernández, nesti casu vamos ver unos problemes xenerales como que la gaita te alta o baxa en xeneral, alguna nota alta, etc.

Espero que vos seyan d’interés y que vos solucionen algun problema, más alante voi tratar con más calma algun aspectu como l’arronquielle de les payueles.


Resultados 2ª fase XXII Liga Galega de Bandas de Gaitas

Banda de Gaites Ribeseya en Lalín

La fase final de la XXII Liga Galega de Bandas de Gaitas disputose esti sábadu 28 de xunetu nel Lalín Arena (Lalín) dempués de munches dudes hasta casi última hora sobre la so ubicación y hasta sobre si se diba poder facer o non.

La competición en primer grao disputose a última hora de la tarde con bona presencia de públicu. El triunfu nun pudo venir p’Asturies y la Banda de Gaites Candás quedo en segunda posición per detrás de Ledicia & Fornelos de Montes y quedando como tercer clasificada la Banda de Gaitas Xinzo de Limia.

Banda de Gaites Candás

Banda de Gaites Candás

En 2º grao la vencedora de la competición foi la Banda de Gaites Ribeseya dirixía por Álvaro Cueto y Diego Purón seguía cola bona marcha garrada na primer fase y nun fallaba nesta fase final, en segunda posición quedaba la Banda de Gaitas Os Blancos d’Ourense.

Norabona a toles bandes participantes pol trabayu d’esti añu y a seguir trabayando más tovía pa que’l siguiente los resultaos seyan inda meyores.

Como datu a destacar pola importancia que tien personalmente pa mí la banda ribeseyana uso por primer vegada payueles míes en sib pa gaites de Miguel Alonso, ye pa mí tou un honor el que la banda campeona use payueles míes.

 

Banda de Gaites Ribeseya en Lalín

Banda de Gaites Ribeseya


XVI Festival de Bandes de Gaites “Villa de Candás”

Cartel festival candás

Esti fin de selmana va tener llugar en Candás un de los festivales de bandes de gaites de más importancia n’Asturies agora mesmu, esti festival “Villa de Candás” vien faciendose dende l’añu 1996. Hai años había muncha más bayura de festivales y alcuentros de bandes pero la crisis llega a too y esti festival tuvo a piques de desapaecer por problemes económicos un añu pero gracies al trabayu en comuña de la Banda de Gaites de Candás siguió p’alantre y anguaño ye un referente pa les bandes.

Nesta XVI edición los que s’averen a Candás van tener la oportunidá de ver a les siguientes bandes:

Banda de Gaites Ribeseya (Asturies)

Banda de Gaitas Xinzo de Limia (Galicia)

Banda de Gaites Llariegu (Asturies)

Bandina d’Escolinos de la B.G Candás (Asturies)

Banda de Gaites Candás (Asturies)

Banda de Gaites Villa d’Avilés (Asturies)

100 Kaba Bagpipes (Bulgaria)

Amás de los grupos folk

Verdasca

Bandina La Curuxa

Banda Latira

El festival va desendolcase tol fin de selmana con diferentes actuaciones en diferentes escenarios de Candás, anque’l platu fuerte ye’l sábadu pola nueche cola actuación de les bandes nel Parque de Les Conserveres, va ser retransmitío pola TPA en directu anque siempre ye más guapo velo ellí. Recomiendovos totalmente acercavos por Candás a disfrutar del ambiente del festival y a ver les diferentes actuaciones.

Podéis informavos de más nel blogue del festival, festivalcandas.blogspot.com.es

 


10º Concursu de Gaita de Xixón

Cartel 10º Concursu de Gaita de Xixón

Seguimos coles anuncies de concursos de solistes porque tamos na época d’ello, un concursu yá tradicional nel calendariu asturianu ye’l Concursu de gaita de Xixón entamáu pol Departamentu de Festeyos del Teatru Xovellanos de Xixón al traviés de la Banda de Gaites Noega.

Esti añu hai tres categoríes nel concursu, Gaita solista, Pareya de gaita y tambor y la novedá d’esti añu, Tambor solista. Va desendolcase en dos fases, semifinales que van tener llugar los díes 2 y 3 d’agostu na Plaza Mayor de Xixón y la fase final el día 6 d’agostu na mesma ubicación.

Darréu espublizamos l’enllaz a les bases pa los posibles interesaos. El plazu d’inscripción fina’l 20 de xunetu de 2012 a les 14:00 hores.

Cartel 10º Concursu de Gaita de Xixón

II Concursu de gaiteros solistes Villaviciosa “Memorial José Huerta Collada”

Festival Internacional de la Gaita - Villaviciosa

La Banda de Gaites Villaviciosa – El Gaitero entama con motivu del Festival Internacional de la Gaita 2012 que va tener llugar na capital maliaya en setiembre d’esti añu el siguiente concursu pa gaiteros solistes del que darréu espublizo les bases pal que tenga interés n’apuntase.

Festival Internacional de la Gaita - Villaviciosa

II CONCURSU DE GAITEROS  SOLISTES VILLAVICIOSA

“ MEMORIAL JOSÉ HUERTA COLLADA”

Bases

1.- Podrán tomar parte tolos concursantes que quieran, siempres a títulu personal.

2.- Estableceránse dos categoríes:

-        Infantil: menores de 15 años (ñacíos antes del 1 de setiembre del 97)

-        Absoluta: mayores de 15 años (ñacíos dempués del 1 de setiembre del 97)

3.- La propuesta d’inscripción tien de formalizase unviando per corréu postal los datos personales nuna fueya (onde constarán nome y apellíos, direición y teléfonu de contautu), amás d’una fotocopia’l DNI a:

BANDA  GAITES VILLAVICIOSA

II Concursu de Gaiteros

APT: 23 – C.P:33300

(Teléfonu d’información: 666593574)

o

concursugaiterosvillaviciosa@gmail.com

4.- El concursu va tener dos estayes: preseleición o semifinal y final, dambes abiertes al públicu. Si’l númberu de participantes inscritos ye menor de 15, tolos participantes pasarán direutamente a la fase final.

- Pa la preselleición o semifinal, el concursante tien d’interpretar un tema de llibre elleición.

- Pa la final, de 15 participantes seleicionaos (si’l númberu d’inscritos ye mayor de 15), el concursante tendrá d’interpretar 2 temes, ún de la llista que vien darréu y otru de llibre elleición. Les canciones han de ser interpretaes ensin añedíos nin supresiones.

 

1.- Muñeira de Remis

2.- Floréu de Remis

3.- Ecos de la Quintana

4.- Fandangu puntiáu

5.-  Muñeira Barganaz

6.- Xota’l Centru

7.- Baille ´l Centru

8.- Alborada’l paxarín

9.- Xota l’Oriente

10.- Muñeira de Veriña

11.- Saltón

12.- Xiringüelu Remis

 

 

5.- La fecha tope pa la receición de les inscripciones ye’l día 17 d´agostu.

6.- La rellación de participantes fadráse pública’l día 22 d’agostu, nun actu abiertu al públicu que se va facer en la Fundación José Cardín Fernandez de Villaviciosa a les 13:30 hores. Nesti actu va sortease l’orde de participación na preseleición y / o final.

7.- La preseleición o semifinal va facese’l domingu 26 d’agostu, a partir de les 19:00 hores, en el llugar estableciu pola organización.

8.- La final del concursu va ser el domingu 2 de setiembre de 2011, a les 19:00 hores, nel llugar estableciu pola organización, nel marcu del Festival Internacional de la Gaita 2012 ( FIG´12).

9.- La non presentación o incomparecencia na preseleición o na final tendrá de ser comunicada cola másima antelación y va trayer consigo la descalificación del concursante. El concursante tendrá de presentase, como mínimo, 60 minutos enantes del entamu, tanto pa la preseleición como pa la final.

10.- Los concursantes han d’emplegar como instrumentu la gaita tradicional asturiana (d’un sólu roncón) en cualesquiera de les sos modalidaes. Tamién ye obligatoriu l’usu del traxe tradicional asturianu, anque sólo na final del concursu.

11.- Afítense los premios que vienen darréu:

-        Categoría Infantil:           1º -150€, diploma y troféu.

                                          2º -50€, diploma y troféu.

                                          3º -30€, diploma y troféu.

-        Categoría Absoluta:      

                                          1º -500€, diploma y troféu.

                                          2º – 200€, diploma y troféu.

                                          3º – 100€, diploma y troféu.

 

11.- El Xuráu tará compuestu por tres miembros cualificaos, designaos pola organización, y presidíu pol direutor de la Banda de Gaites Villaviciosa o persona na que delegue.

12.- El fallu del Xuráu sedrá inapelable; asina mesmo, resérvase’l drechu a la meyor interpretación d’estes bases, a les que s’obligarán los concursantes pol fechu de formalizar la so inscripción.

13.- El ganador del concursu tendrá que facer una actuación de 15 minutos en un establecimientu collaborador ( 23,00 h. aprox).

 


Colocar la payuela nel punteru

payuela nel punteru

Algo perimportante a la hora de colocar la payuela nel punteru de la gaita ye hasta ónde la metemos na garganta del punteru. Por norma xeneral, en toles gaites metiendo la payuela al tope de lo que nos permita el punteru conseguimos un soníu estable, potente y claru. Cuantu menos calada vaya nel punteru, menos vamos conseguir esti soníu, si bien ye cierto que n’ocasiones puede interesar non calala al tope, yá que l’espaciu que se produz entre’l ferrete y el conu, que pue nun llegar nin a un par de milímetros, fae que la payuela desafuegue la corriente d’aire muncho meyor, meyorando sobre tou les notes de requintu.

Probando a introducir más o menos la payuela y faciendo la combinación xusta entre ella y el punteru podemos conseguir un términu mediu d’estes cualidaes consiguiendo un soníu estable, potente y claru, pero también conseguir que les notes de requintu meyoren considerablemente sacando asina el másimu rendimientu al punteru.

 


Tabla 1, Subir tonu baxar tonu

Entamamos con esta una serie de post dedicaos a unes tables perinteresantes feches por Pelayo Fernández que parten d’aspectos básicos pa furrular cola payuela, n’esti casu el subir o baxar el tonu en xeneral.

Otru día estudiaremos les distintes zones de raspao de la payuela de la gaita asturiana o los problemes más comunes que suelen presentase a la hora d’empayolar un punteru y les sos posibles soluciones.

Tabla 1. Subir o baxar tonu de la payuelaTabla 1. Subir o baxar tonu de la payuela

 

El conceptu de caña blanda/duro varía en función del material al ser la caña un material natural, pero podemos seleccionalo y tenelo en cuenta gracies al test del agua del que yá falamos anteriormente nel post dedicáu a la selleición del material.


El celo como recursu pa la afinación del punteru

L’usu de celo o cinta aislante pa facer más pequeñu el tamañu de los furacos de les notes del punteru ye un vezu en gaiteros d’otres zones pola so facilidá y buen resultáu, pero equí n’Asturies anque si ye usáu por bastante xente otros a veces por desconocimientu o a veces por “purismos” de nun querer importar modes que n’esti casu si que son beneficioses pal instrumentu nun lo faen.

En resumides cuentes l’efectu que se consigue ye que si una nota ta alta (falamos alto o baxo en rellación cola afinación) amenorgando el diámetru del furacu con celo o cinta aislante conseguimos baxar esa nota. Ye curiosu el casu del mi natural, que tapando con cinta parte de la tronera trasera conseguimos l’efectu contrariu de subir la nota.

Pa saber cuantu tenemos que tapar pondremonos delante l’afinador (o d’oreya si tas avezáu) y habrá que dir probando hasta que la nota que queramos igüar quede nel sitiu.

rollu de celo


Resultaos 1ª fase XXII Liga Galega de Bandas de Gaitas

Esti fin de selmana disputose nel Pazo de Congresos e Exposicions de Galicia en Santiago de Compostela la primera fase de la XXII Liga Galega de Bandas de Gaitas onde competíen les asturianes BG Candás en primer grau y BG Ribeseya en segundu.

Nel casu de segundu y primer grau la competición desendolcose pola tarde y tuvo los siguientes resultaos.

2º Grao.

1. Ribeseya

2. Os Blancos

3. Os Trintas

La banda ganadora d’esta fase, la asturiana de Ribeseya dirixida por Diego Purón y Álvaro Cueto saco un total de 24,65 puntos más que la segunda clasificada, Os Blancos de Ourense que quedo más axustada cola tercera clasificada, Os Trintas de Trives quedando a 2,4 puntos.

1º Grao.

1. Ledicia & Fornelos de Montes

2. Candás

3. Xinzo de Limia

N’esti casu el premiu quedo en tierres gallegues pa la banda Ledicia & Fornelos de Montes que quedo a 4’49 puntos de la segunda clasificada, la banda asturiana de Candás dirixía por Velu Muñiz. La tercera clasificada, la banda ourensana de Xinzo de Limia quedo a namás 1’11  puntos del segundu puestu de Candás polo que la competición tará reñida na segunda y última fase de la liga que se va cellebrar el caberu fin de selmana de xunetu pero que inda nun se sabe onde va tener llugar.

Puen consultase les puntuaciones completes na web de la Federación Galega de Bandas de Gaitas
Norabona dende equí a les bandes participantes y suerte pa la segunda fase.


Roncones y requintos

Les notes de requintu na gaita asturiana correspuenden a la segunda octava de la que’l punteru tradicionalmente podía dar media (anguaño tan desendolcandose nuevos punteros, estudios y posiciones p’algamar una segunda octava entera). Son notes bastante usaes na música asturiana, sobremanera nos floreos que’l gaiteru toca al entamu y al final d’una pieza pa probar la gaita y calentar los deos pero que pola so poca duración nun se-yos presta demasiada atención a la afinación.

Un problema mui común nes gaites al subir a estes notes de requintu ye que’l roncón varíe porque estes notes consiguense con mayor presión d’aire na payuela. Si queremos podemos amenorgar considerablemente la variación del roncón si a la hora d’afinar el mesmu separamos la copa y la tercia, envede afinar el roncón como normalmente se fae moviendo namás que la tercia separandola o xuntandola cola prima. Repartimos asina la presión del fluxu d’aire nes tres pieces envede facelo namás qu’en dos.

Al nun abrir tanto la prima y la tercia y abrir ente la tercia y la copa algamamos que les cámares interiores del roncón formaes polos diferentes diámetros de los taladros interiores se compensen, l’aire circula más estable y la variación de soníu del roncón al requintar ye muncho menor.

Separación copa y tercia roncón

Separación copa y tercia roncón


Championnat des Bagadoù Brest 2012

Güei tuvo llugar na ciudá bretona de Brest el Championnat des Bagadoù de primera categoría d’esti añu 2012. Entamáu como ye vezu tolos años pola asociación Bodadeg Ar Sonerion, qu’axunta tolos bagadoù de Bretaña.

El campeonatu, retransmitíu en directu pol canal France3 – Breizh y pola páxina web Antourtan, ufierto les actuaciones de tolos bagadoù, toos ellos de gran calidá, montaxes guapos como los qu’avecen a tocar esti tipu de formaciones compuestes por gaites, bombardes y percusiones fundamentalmente.

El ganador foi’l Bagad Kemper con un set bien guapu y bien empastáu de soníu, mentantu el segundu puestu foi pal Bagad Cap Caval y en tercer llugar quedo’l Bagad Kevrenn Alré. Equí podéis ver les puntuaciones oficiales de la web de BAS.

Bagad Kemper (Brest 2012)

Bagad Kemper (Brest 2012)

Bagad Kemper recoyendo los trofeos de campeones

Bagad Kemper recoyendo los trofeos de campeones


El taller de gaites de Cogollu

Antón de Cogollu

Manuel de Cogollu

Manuel Álvarez (Manuel de Cogollu), ñació en Cá Valiente Carbayal (Llanera). Na casa teníen un taller de carros y madreñes y pel iviernu contrataben a madreñeros que llegaben dende Vioño (Gozón). Ún d’ellos trayía una gaita cola qu’amenizaba les nueches tan llargues de la ivernada. Manuel sintióse atrayíu; la curiosidá y la disponibilidá de ferramienta del taller fizo que se decidiese a intentar fabricar una gaita él mesmu copiando de la del madreñeru de Vioño. Darréu quiso aprender a tocala atendiendo con procuru pa los gaiteros de la zona.

Casóse con Carmen Vega nel pueblu de Cogollu (parroquia de San Xuan de Trasmonte de Les Regueres). Ellí siguió col oficiu y nel so taller – fragua del Rozu siguió tamién perfeccionando l’instrumentu algamando notables resultaos en timbre y afinación. Tuvo cinco fíos: Ramón, José, Bernardo, María y Antonio. Cuenten los sos allegaos qu’amás d’Antonio que foi quién siguió col so legáu, llegaron a tocar bien la gaita Ramón, Bernardo y María.

Antón de Cogollu

Antonio Álvarez Vega (Antón de Cogollu) ñaz nel añu 1883 y sigue construyendo gaites nel taller de so pá hasta que casa con Leonor Valdés de Cá Rufa nel pueblu d’Alceu (parroquia de Sotu de Les Regueres) onde instala’l nueu taller. Tuvieron nueve fíos: Florentino, Manuel, Corsino, David, Primitiva, Amada, María, Alegría y Francisco Antonio.

Esti caberu llegó a facer alguna gaita, pero una enfermedá de mozu dexólu indispuestu y torgó la posible continuidá d’esta saga d’artesanos.

La meyor forma de conocer lo que fue’l taller y el trabayu d’Antón en Sotu ye lleer lo que nos cuenten dos colectivos diferentes: los que lu conocieron (xente de la so familia como la muyer o los fíos) y los qu’estudiaron a fondu el so trabayu (gaiteros como Pepe Veriña, Ignacio Noriega o José Angel Hevia o constructores de gaites como Vicente Prado “El Pravianu” o Alberto Fdez. Velasco

EL TALLER

Pepe Veriña (gaiteru): “Yo de chaval tuve nel taller; tenía nel portalón de casa un tornu de pértiga, d’esos que se movíen por una cincha de cueru y pedal; sacaba la copa’l roncón d’una sola pieza y bien vaciada.”

Ignacio Noriega (gaiteru): “… tamién m’alcuerdo que tenía un tornu mui grande y que yera de pedal, y que les copes torneábales d’una pieza y vaciábales ente les piernes…”

Monchu (vecín de Villayo, Llanera): “mio pá tocaba la gaita y fui con él a buscar una a Alceu…. El taller, si podía llamase asina, teníalu debaxu la sala y el tornu yera nada; una polea de cornal de sobéu a pedal..”

El Pravianu (gaiteru y constructor): “… Los torneaos tan perfectos, incrustaciones de marfil… pero quedé ablucáu cuando nel añu noventa pude ver el tornu y la ferramienta que conserven na so casa, faciéndome la idea de los medios colos que trabayaba.

Alberto Fernández Velasco (constructor de gaites): “… y estos paisanos, con un tornu de ballesta, facíen milagros…”

Pieces que conserven en casa de Cogollu

LA MAERA

Emilia (vilba de José Valiente de Carbayal): “… la maera y el marfil de la gaita del mio suegru Valiente, traxéronla unos familiares d’Estaos Xuníos…”

Ignacio Noriega (gaiteru): “ Pues al tíu Antón conocílu una vegada qu’unos indianos de Vidiago vinieron y dixéronme que queríen encarga-y una gaita con maera que traxeren, creo que yera ébanu…”

Alegría Álvarez (fía d’Antón): “… facía munches de buxu, al principiu diba por él al palaciu de Cañe… tamién traíen familiares y amigos maera d’América… “

Marfil conservau en su casa

EL FUELLE Y EL VESTÍU

María y Alegría Álvarez (fíes d’Antón): “Mio pá mercaba algunes de les oveyes a la vecina, Josefa La Pila, y él matábales… la pelleya envolvíala un tiempu en sal, dempués untábalo en ceniza o fariña de maíz, colgabalos con paya dentro pa que aireasen”

“cosíamos los vestíos pa les gaites Alegría y otra hermana, Primitiva. Tamién una señora d’Uviéu que yera la muyer d’un teniente de la Fábrica de La Vega, ella facía flecos a mano y fundes bordaes… “

Fecha por Manuel de Cogollu

Fecha por Antón de Cogollu envirolada en marfil

LES PAYUELES

Gelín de La Casuca (gaiteru de Les Regueres): “… conocí personalmente a Antón y yera muy maniáticu pa trabayar. Facíales de nueche cuando nada ni nadie lu molestare… yeren más piquiñines que les d’agora…”

Alberto Fernández Velasco (constructor): “… les gaites en do# salieron mui buenes, pero cuesta empayuelales. Dixéronme Fariñas y Pepe Blanco qu’él empayuelaba de viciu. Los instrumentos con él, teníen la vida que teníen que tener, porque yeren paríos por él…”

Ignacio Noriega (gaiteru): “… pues home; yera mui buen paisanu y mui buen gaiteru, amás facía buenes payueles; aquelles sonaben siempre…”

LA VENTA DEL INSTRUMENTU

Mª del Carmen (nieta d’Antón): ”… yo yera mui neña cuando morrió mio güelu, pero alcuérdome de velu marchar cola burra y sacaos de punteros pa vender. Otres veces garraba’l tren y marchaba unos díes con gaites. Tamién llegaben encargos por carta d’indianos y pasaba muncha xente pol taller a recoyer los encargos…”

Rogelio Fernández Lana (gaiteru de Teberga): “Diba muncho pola zona a dexar encargos, yo a reparar iba a so casa…”

Nemesio (gaiteru de Torrestío): “… yo supe d’él polos que llevaben el ganáu a Torrestío d’ehi de Les Regueres; mande-y una carta encargando-y una y llevómela hasta Teberga…”

Gelín de Villamiana (gaiteru): “Fue a comprámela José El Xarreru a so casa porque teníen amistá… costóme cuatro mil quinientes pesetes; que me paecieron munches perres. Díxome José “lo bueno hai que pagalo”.

Gelín de La Casuca (gaiteru de Les Regueres): “… cuando quería vender una gaita, poníase a tocala y arremolinábase la xente al so alredor y terminaba vendiéndola…”

Punteros de Cogollu

LA HERENCIA MUSICAL DE COGOLLU

Enrique Mariño El Xarreru la Cuesta de Fitoria foi’l principal deprendiz de repertoriou musical tradicional. En cuantu a la construcción del instrumentu sabemos que Pachu el de Turón pasó llargues temporaes en Alceu, primero deprendiendo a tocar y más tarde viendo como’l maestru Antón torniaba y empayuelaba. Tamién Agapito Pombo en Caborana tenía como referencia los punteros de Cogollu.

Antón ganó seis premios nacionales, varios na Esposición Provincial d’Artesanía, diplomes y medalles.

Gaita fecha por Antón de Cogollu

Nos años ochenta los sos seguiores y estudiosos de la so obra fueron Vicente Prado “El Pravianu” y el recientemente fináu Alberto Fdez. Velasco. A partir d’esti modelu y como ellos mesmos dixeron, con munchu camín abiertu gracies a Antón, punxéronse a trabayar pa temperar y cromatizar el punteru. Con motivu del actu conmemorativu del cincuenta aniversario de la muerte d’Antón (cellebrao el 27 de marzu de 2009) pudimos oyer d’estos dos maestros frases como les que siguen:

El Pravianu: “Cuando entamé a construir en 1978, supe que Cogollu había sio conocíu por tolos gaiteros antiguos y valoráu como’l meyor fabricante de gaita. Toles que llegaron a mí les estudiaba, analizaba y quedaba ablucáu de lo bien trabayaes que taben. Indudablemente foi un home con unes cualidaes estraordinaries pa trabayar. La familia Cogollu foi un pasu perimportante pal perfeccionamientu del instrumentu y el so recuerdu quedará siempre na mente como que lo foron padre y fíu; los meyores.”

Alberto Fdez Velasco: “Él pa mí foi un adelantau de la época… yo namás puedo falar bien d’él y nun lu conocí. El so trabayu siempre merecióme un respetu pergrande, tolos instrumentos qu’empayuele suyos, toos salieron airosos. El so mayor don yera’l timbre y la tónica. Tuvo munchos admiradores, que fuimos los que lu defendimos. Hebo algún problema, porque prestáronse les gaites y tola xente no fue seria al querer copialu y metíen allá de too y aquella timbración que teníen, algunes perdiéronla.

José Angel Hevia (gaiteru): “…la factura de los sos instrumentos merez l´adxetivu d´esquisita. Una pieza torniada poles manes de Cogollu ye más qu´una pieza de gaita. Ye una pieza d´un instrumentu musical. Güei tocamos gaites basaes organolóxica y estéticamente nes de Cogollu. Fixéronse estudios acústicos de los punteros, midiéronse una y cien vegaes los conos interiores, radiografiáronse instrumentos a la gueta d´un secretu tan buscau como´l de Stradivarius. Seguimos la pauta de Cogollu n´estos tiempos nos que la fabricación de gaites nun ye axena a les nueves tecnoloxíes, a la informática, al control numéricu”.

Hebo na gaita asturiana un antes y un dempués del modelu de Cogollu. Manuel y Antón consiguieron graos d’afinación desconocíos hasta aquella fecha y un timbre qu’entovía güei sigue persiguiéndose como’l xenuinu del nuesu instrumentu. Llegaron a construir una amplia gama de punteros, personalmente conservo una docena que van dende 23 cm a 34.5 cm (Mi a Sib). Toos estos testimonios describen a unos artesanos perfeccionistes que con unos medios non mui allá, algamaron unos resultaos sobresalientes.

Alfonso Fernández (Fonsu Les Regueres)
Toles opiniones foron recoyíes por Fonsu y publicaes más estensamente nel Anuariu 2 de la A.C “La Piedriquina”

(Quiero agradecer a Fonsu Les Regueres esti artículu y el so trabayu de dignificación de la gaita asturiana teniendo na memoria a xente como Manuel o Antón de Cogollu, figures perimportantes de la tradición de gaita n’Astutries)