Reeds & Drone Reeds for asturian bagpipe

Latest

¿Cuántu tiempu dura una payuela?

“Porque tengo yo un conocíu… que lleva 6 años cola misma payuela na gaita de [insertar equí nome d'artesanu] y como un cañón chaval, flipes eh? Pero flipes! Como’l primer día!”

Quién dentro del mundillu gaiteril nunca oyó esta frase recurrente sobremanera a ciertes hores de la nueche onde too se magnifica y la xente entama a competir por ver que gaita tien una payuela más vieya y qu’haya resistío más batalles??

 

Por eso güei voi falar d’un tema con un poco de polémica, sería bien fácil pensar que’l mayor interés d’un payueleru como soi yo ye que la xente cambie cada poco de payueles y aunque’l tema económicu siempre ta presente nesto pa bien y pa mal (tirando payueles a medies  o alargando la vida de payueles que tan más qu’acabaes) un puntu importante y que munches veces se dexa de llau ye’l nivel de respuesta d’una payuela nueva y recién empayuelada.

Les payueles como yá tratamos n’algún post esplicativu sobre l’orixe de la caña son la mayor preocupación de los gaiteros porque xunen un material vivu como ye la caña cola técnica d’un instrumentu de vientu como ye la gaita onde l’afinación se consigue pola presión lineal que vien de la combinación fuelle + soplar.

Si nos ponemos a investigar sobre la caña (arundo donax) dámonos cuenta rápido de que ye un material vivu que tien un procesu de crecimientu, dende que la semiente entama a espoxigar na tierra hasta que los recolectores d’ello deciden que ye’l momentu de cortar. Pasa dempués al procesu de secao y selección del mesmu, cosa que tien bastante que ver col resultáu final, yá que por mui bonu que seya’l tarrén onde ta plantáo la caña, ensin un bon procesu de secáu la caña echase a perder. Finalmente llega a manes del payueleru que ye’l que trabaya los tubos pa convertilos nes dos llámines de caña que producen el soníu de la gaita.

Seguíamente, cuando la payuela yá ta terminada, puesta n’una gaita acorde a les esixencies d’afinación y gustu del gaiteru entama inevitablemente’l procesu de deterioru de la caña, insuflamos aire na gaita a través del soplete y esti aire condensase nel interior del fuelle pola diferencia de temperatura ente’l nuesu cuerpu y l’esterior, esta humedá y la vibración de les dos pales de la payuela faen que col tiempu la payuela vaya perdiendo brillu.

Payuela nueva vs. payuela vieya
Payuela nueva vs. payuela vieya

Que quier decir tou esto? Una payuela va sonar igual una semana depués d’empayolar que ye cuando va asentar y quedar perfecta que dos años depués? NON! Pue sonar bien? sí, pero de nenguna manera tará col mesmu potencial de soníu nin la mesma respuesta.

Y la entruga del millón… ¿Cada cuantó habría qu’empayolar entós? Depende, munchos factores como les hores que’l gaiteru-y meta a l’instrumentu, l’ambiente onde ta la gaita (la humedá de la casa onde vivamos influye y muncho), o inclusu el propiu cuerpu de cada unu yá que non toos tenemos la mesma temperatura corporal y hai xente que saliva más o menos a la hora de tocar.

Como recomendación personal, por norma xeneral en torno a ocho meses/un añu sería una duración que yá tuvo bien teniendo un usu normal de en tornu a 15 minutos diarios y una clase o ensayu semanal d’una o dos hores.

Al final, ta nes manes del gaiteru saber cuando la payuela ta “acabada” (por llamalo d’alguna manera) y ye recomendable camudala por una nueva que de al instrumentu la meyor sonoridá posible.

Bibliografía: “Les anches de cornemuses du centre de la France” de Jean-Jacques Smith

Siguiendo cola serie de post que prometí dedicaos a parte de la bibliografía dedicada al mundu de la gaita güei voi reseñavos esti llibretín editáu pol Centre des Musiques Traditionnelles Rhône-Alpes y que ta escritu por Jean-Jacques Smith.

 

Vien a ser un pequeñu manual de fabricación de payueles pa gaites franceses de centru, nes sos escases 55 páxines despliquense tolos pasos con medíes de la pala pa sacala dende’l tubu de caña. Como seleccionar y cortar la caña, trabayala, montala y terminala. Les payueles pa estes gaites son bastantes llargues pero bastante estreches al mesmu tiempu (en comparación coles asturianes que tamos acostumaos a ver) Tien tamién otru capítulu dedicáu a payones de caña, como facelos y posibles soluciones a problemes típicos d’esti tipu de payones.

Finalmente termina con unes tables onde salen medíes pa fabricar payueles y payones pa los diferentes tonos nos que se fabriquen estes gaites.

cornemuses du centre (semeya sacada de la web del constructor Bernard Blanc http://cornemuses.blanc.free.fr/ )

cornemuses du centre (semeya sacada de la web del constructor Bernard Blanc http://cornemuses.blanc.free.fr/ )

Ye un trabayu mui básicu pero bien presentáu y bien fecho, echase’n falta un poco más d’información pero lo básico ta ehí, depués yá son hores de pelar tubos y tubos de caña. El libru ta disponible na tienda online del centru por 12 euros.

Bibliografía: “Highland bagpipe makers” de Jeannie Campbell

La literatura gaiteril ye un aspeutu quiciaves bastante desconocíu p’algunos y por ello voi entamar una serie de posts acerca de varios llibros interesantes al rodiu de mundu de la gaita, la construcción d’instrumentos y les payueles dende la óptica de varies gaites y varies llingües.

 

El qu’escoyí pa entamar por puru azar ye esti “Highland Bagpipe Makers” de Jeannie Campbell, nun apaez nenguna reseña d’editorial que lu haya espublizao polo que nun vos pueo dar más señes que’l títulu y l’autora. Yo merquelu nel National Piping Centre de Glasgow nel viaxe que fice nel añu 2012 a los World Pipe Band Championships por 20 libres, aparte de na tienda online del centru en casi cualisquier tienda de gaites y accesorios d’Escocia vais poder topalu y la verdá ye que ye una enciclopedia del tema.

La edición que yo tengo y la que ta agora mesmu disponible a la venta polo xeneral ye la segunda, revisada y con más constructores y más semeyes que la primera (la primera edicion el númberu de constructores sobre los que l’autora aportaba información yera de 108 y nesta segunda edición ye de 124)

 

Pasando al conteníu del llibru fai una introducción mui breve desplicando lo que son les pieces o los materiales usaos y mui por encima los procesos de construcción del instrumentu. Entiendo yo porque ye un libru pa iniciaos nel tema y non pretende dar lleiciones d’esto y centrase más nel aspectu del valir históricu de la cuestión, pa pasar dempués a más de 200 páxines cola hestoria y semeyes bien curioses de los constructores de gaita escocesa por orden históricu dende l’añu 1748, tamién hai semeyes de los diferentes talleres, de catalógos de la época y otres curiosidaes.

 

 

En resumíes cuentes un llibru interesante como hestoria de la construcción de gaites escoceses y onde se pue ir viendo’l desendolcu d’esta industria manual con toles lletres y la importancia que tuvo y tien n’aquel país.

 

Concursu de Bandes de Gaites de Xixón 2013

Esti sábadu 27 de xunetu va tener llugar nel recintu del Pueblu d’Asturies en Xixón el Concursu de Bandes de Gaites de Xixón 2013 que ta dientro de les actividaes del Festival Arcu Atlánticu.

Dende l’últimu Campeonatu d’Asturies entamáu pola FIGA nel 2002 nel mesmu escenariu nun había manera de facer algo asina otra vez, dempués d’algunos intentos y non poques discusiones por fin hai al menos una fecha nel calendariu de les bandes qu’esperamos que siga p’alante nel tiempu y vayan a más les bandes participantes.

 

 

L’apertura de puertes va ser a les 10:30 y la primer banda en concursar va facelo a les 11:00, hai 9 bandes inscrites y l’orde d’actuación ye’l siguiente calculando más o menos unos 10 minutos pa cada banda.

 

1. Banda de Gaites El Gumial (Morea d’Ayer)

2. Banda de Gaites El Exambre (Navia)

3. Banda de Gaites Xácara (Uviéu)

4. Banda de Gaites Candás (Candás)

5. Banda de Gaites LaKadarma (Nava)

6. Banda de Gaites Noega (Xixón)

7. Banda de Gaites Castrillón (Castrillón)

8. Banda de Gaites La Reina del Truébano (Navia)

9. Banda de Gaites Ribeseya (Ribeseya)

 

El xuráu del certamen ta compuestu por Marco Antonio Guardado nel apartáu de gaita, Stuart Cassels nel apartáu de conxuntu, Tommy Johnston na percusión y Leopoldo García na estética.

 

Al finar el concursu les bandes van desplazase hasta’l puertu deportivu de Xixón onde a eso de les 13:30 entamára un pasucais dende la estatua de Pelayo hasta l’escenariu del Festival situáu al final de paseu de Fomento. Ellí va facese la llectura de les puntuaciones y la entrega de premios a les bandes meyor clasificaes.
Dende equí deseái muncha suerte a toles bandes participantes y que seya un día guapu de convivencia entre toos.

Abiertu plazu d’inscripción na Escola de Artes e Oficios de Vigo

Al traviés del blogue Vento e madeira del Aula de construcción artesanal de instrumentos tradicionais galegos de vento na Escola Municipal de Artes e Oficios de Vigo facemonos eco de l’apertura del plazu d’inscripción pal cursu 2013/2014 na escola.

 

Esta escola, onde aprendieron la gran mayoría de los artesanos de gaita que construyen güei en Galicia de manes primero d’Antón Corral y agora mesmu del fíu Ramón Corral ye’l únicu sitiu onde hai estudios reglaos sobre construcción d’instrumentos tradicionales. Otros profesores importantes son por exemplu el zanfonista y constructor de zanfones Xaime Rivas yá que non solo se dan estudios de gaita si no que tamién hai aules de luthería antigua y de zanfona.

 

Nun taría mal una cosa asi n’Asturies, pero de momentu… pa los interesaos dir a Vigo nun ye mala opción.

 

Semeya del blogue http://bibliotecadaemao.blogspot.com.es/

Aula de C.A.I.M de Gaita y zanfona

 

Poiter

El pasáu sábadu 27 d’abril presentose’n Llaviana “Poiter”, un productu desendolcau pol gaiteru Pablo Carrera que contribuye un poco más al futuru de la gaita.

El Poiter ye un soporte específicu pa gaita (tantu asturiana como gallega o escocesa) formáu por un pie y dos brazos, ún pa sostener el roncón y otru p’apoyar n’él el punteru de la gaita. Ye plegable pa poder llevalu a les actuaciones y amás ye personalizable porque podemos escoyer color pa la pinza del roncón.

despiece PoiterPoiter (Fotos de Marcos Vega / Photolounge)

El inventu patentáu del gaiteru llavianés vien a cubrir el vacíu qu’esistía n’esti aspectu pa un instrumentu como la gaita, nel que siempre se tuvo qu’usar por exemplu una silla pa colocar el instrumentu mientres nun se taba tocando con él.

Ye bien guapo ver como les nueves xeneraciones vamos aportando’l nuesu granín al mundu la gaita y naguamos por ver como’l mercáu del Poiter medra asina como l’espoxigue de nuevos productos pa la gaita a veces simples pero necesarios como ye esti soporte.

Pablo Carrera

Pablo Carrera (Fotos de Marcos Vega / Photolounge)

Pues conseguir el tuyu equí al preciu de lanzamientu de 75 euros.

Tabla 3, Problemes básicos II

Equí vos dexo la cabera tabla de Pelayo Fernández, na que se fae referencia a varios problemes básicos a la hora d’empayolar la gaita.

Espero que vos seya d’utilidá.

 

Tabla 3, Problemes básicos II (Pelayo Fernández)

Tabla 3, Problemes básicos II (Pelayo Fernández)

Cancioneru de la gaita asturiana

Esti ye’l caberu trabayu editáu pol Múséu del Pueblu d’Asturies, obra de los investigaores Gausón Fernande Gutierri, Fonsu Fernández García y el mayestru gaiteru Eugenio Otero Vega, anguaño director de la Banda Gaites Conceyu de Siero.

El mesmu ta compuestu por dos volúmenes, ún entituláu “Historia y usos” con muncha y perbona información sobre la figura del gaiteru, la perceición social del pueblu pa colos gaiteros, o l’oficiu de gaiteru. Amás d’ello desplica la función tradicional de la gaita na vida diaria d’Asturies (acompañar al cantu, les fiestes, los casorios…) y tamién por nun quedase namás que cola tradición, afonda nel camín que sigue la gaita a día de güei, les innovaciones que tuvieron llugar, los cambios y tolo que pasa anguaño con esti instrumentu.

Rescampla pa mí la parte de faceores de gaites onde sal muncha información sobre artesanos vieyos y d’anguaño de la gaita, un apartáu del llibru pal que yo dedicaría otru llibru aparte más estensu tovía, porque información hai asgaya y hai mui poco publicao sobre ello. La pena ye qu’echo en falta a ún de los constructores con más proyeición nos caberos años como ye Chus Solís. De toes maneres ye un bon capítulu del trabayu complementáu al final incluso por planos de gaites de diferentes faceores.

El segundu volumen muncho más grande que’l primeru ta dedicáu a les partitures onde a lo primero del llibru tamién vienen esplicaos les peculiaridaes de cada xéneru de la música de gaita n’Asturies. Hai munchos temes yá conocíos pero son diferentes versiones na mayoría de los casos, sicasí la mayor importancia de la obra son les pieces inédites hasta agora n’el recoyíes.

En resumíes cuentes, un gran trabayu imprescindible na biblioteca d’un gaiteru, animo a la xente del Muséu a seguir trabayando en coses así.

 

Tabla 2, Primeros problemes básicos

Depués d’un pequeñu parón volvemos a la carga otra vuelta coles tables sobre afinación feches por Pelayo Fernández, nesti casu vamos ver unos problemes xenerales como que la gaita te alta o baxa en xeneral, alguna nota alta, etc.

Espero que vos seyan d’interés y que vos solucionen algun problema, más alante voi tratar con más calma algun aspectu como l’arronquielle de les payueles.

Resultados 2ª fase XXII Liga Galega de Bandas de Gaitas

La fase final de la XXII Liga Galega de Bandas de Gaitas disputose esti sábadu 28 de xunetu nel Lalín Arena (Lalín) dempués de munches dudes hasta casi última hora sobre la so ubicación y hasta sobre si se diba poder facer o non.

La competición en primer grao disputose a última hora de la tarde con bona presencia de públicu. El triunfu nun pudo venir p’Asturies y la Banda de Gaites Candás quedo en segunda posición per detrás de Ledicia & Fornelos de Montes y quedando como tercer clasificada la Banda de Gaitas Xinzo de Limia.

Banda de Gaites Candás

Banda de Gaites Candás

En 2º grao la vencedora de la competición foi la Banda de Gaites Ribeseya dirixía por Álvaro Cueto y Diego Purón seguía cola bona marcha garrada na primer fase y nun fallaba nesta fase final, en segunda posición quedaba la Banda de Gaitas Os Blancos d’Ourense.

Norabona a toles bandes participantes pol trabayu d’esti añu y a seguir trabayando más tovía pa que’l siguiente los resultaos seyan inda meyores.

Como datu a destacar pola importancia que tien personalmente pa mí la banda ribeseyana uso por primer vegada payueles míes en sib pa gaites de Miguel Alonso, ye pa mí tou un honor el que la banda campeona use payueles míes.

 

Banda de Gaites Ribeseya en Lalín

Banda de Gaites Ribeseya